सन्ध्याको ‘मिर्मिरे’ सार्वजनिक

काठमाडौँ, असार १० । नेपाल आइडल सिजन वानबाट चर्चामा आएकी गायिका सन्ध्या जोशीको नयाँ गीत मिर्मिरे सार्वजनिक भएको छ ।
शुक्रबार जोशीले आफ्नै आधिकारीक युट्युब च्यानलमार्फत गीतको भिडियो सार्वजनिक गरेकी हुन् ।
नेपाल आइडलमा उत्कृष्ट नौमा पुग्न सफल भएकी गायिका जोशीले यसअघि २ वटा गीत सार्वजनिक गरिसकेकी छन् । आफ्ना गीतमा प्रायः आफै देखिने सन्ध्या आफूलाई खासमा अभिनय गर्न भन्दा गाउन बढी सजिलो लाग्ने बताउँछिन् ।
प्रशन्न घिमिरेको शब्द तथा मनोज थापा मगरको संगीत रहेको गीतको भिडियोमा सन्ध्यासँगै भिजे तथा मोडल सुदित श्रेष्ठको अनस्क्रिन रोमान्स हेर्न सकिन्छ ।
पोखराका रमणीय स्थलहरुमा छायांकन गरिएको गीतको भिडियो निर्देशन मोडल सुदित श्रेष्ठले गरेका हुन् । उज्वल जोशीको सिनेम्याटोग्राफी तथा सम्पादन रहेको छ ।