सृष्टिका लागि विनयले काटे कान

काठमाडौँ, असार १० । साउन ११ गतेदेखि देशभर प्रदर्शनमा आउने चलचित्र ‘रोमियो एण्ड मुना’ को अफिसियल ट्रेलर सार्वजनिक भएको छ । अभिनेता विनय श्रेष्ठ र अभिनेत्री सृष्टि श्रेष्ठको प्रमुख भूमिका रहेको फिल्मको ट्रेलरको क्लाइमेक्समा रोमियो (विनय) ले मुना (सृष्टि) का लागि आफ्नो कान काटेका छन् । सृष्टिको प्रेमले विनय परिवर्तन भएको देखाइएको छ ।
यसअघि सो चलचित्रको रोमान्टिक गीत ‘भेडेटार घुमौला’ सार्वजनिक भएको थियो । गीतमा चलचित्रका मुख्य कलाकार श्रृष्टि र विनय नै देखिएका थिए । कोसिस क्षेत्रीको संगीत रहेको गीतमा विनय र मिना निरौलाले स्वर भरेका छन् । अभिनेता विनयले यसै गीतबाट गायनमा समेत डेब्यु गरेका छन् । गीतको शब्द दिनेश राउतले कोरेका हुन् ।
केही दिन अगाडी राक्षस अवतारको पोष्टर रिलिज गरेको चलचित्रले यस अगाडी फरक फरक तीन गीत समेत रिलिज गरिसकेको छ ।
पाँच गीत रहेको चलचित्रको अझै एक गीत सार्वजनिक गर्न बाँकी रहेको निर्माता प्रशन्न गोपालीले जानकारी दिएका छन् ।
‘रोमियो एण्ड मुना’ चलचित्रलाई नरेश कुमार केसीले निर्देशन गरेका हुन् । यसअघि उनले ‘डाइङ क्यान्डल’ फिल्म निर्देशन गरेका थिए । निर्देशक केसीको पटकथा रहेको फिल्ममा निरोज महर्जनले केसीलाई संवाद लेख्न सघाएका छन् ।
फिल्ममा विनय र सृष्टिसँगै सुस्मा कार्की, सुरक्षा पन्त, प्रज्ज्वल सुजल गिरी लगायतका कलाकारहरुको अभिनय छ । फिल्म ‘रोमियो एण्ड मुना’ प्रशन्नमान गोपाली, रोजी श्रेष्ठ, राम शर्मा र कविन शाक्य मिलेर बनाएका हुन् ।