श्रीमतीपीडित दुई पुरुषद्वारा प्रहरीमा उजुरी

पर्वत । श्रीमानले अन्याय गरेको भन्दै श्रीमतीले उजुरी दिने गरेको कुरा त नौलो होइन तर, पर्वतमा भने पहिलोपटक पत्नी पीडित भएको भन्दै दुई वटा उजुरी परेका छन् ।
जिल्ला प्रहरी कार्यालय पर्वतकी महिला तथा बालबालिका सेवा केन्द्र इञ्चार्ज रचना थापाका अनुसार महिला सेलमा दुई जना पुरुषले श्रीमतीबाट पीडित भएको भन्दै न्यायका लागि उजुरी दिएका छन् । न्यायका लागि उजुरी दिनेमा जलजला गाउँपालिका–२ धाइरिङका एक पुरुष र कुश्मा नगरपालिका–१ पाङका अर्का पुरुष छन् ।
उनीहरु दुवै जनाले श्रीमतीले छोराछोरी पालनपोषणमा ध्यान नदिएको र घरभन्दा बाहिर बढी समय दिने गरेको भन्दै न्यायका लागि उजुरी दिएका हुन् । उजुरीउपर जिल्ला प्रहरी कार्यालय पर्वतले पाङका पीडित पुरुषका श्रीमान श्रीमती दुवै जनालाई कार्यालयमा बोलाएर मिलापत्र गराएको छ भने जलजलाका पत्नी पीडित व्यक्तिको मुद्दा अझै कानुनी प्रक्रियामा छ ।
यस्तै सेवा केन्द्रमा आव २०७४÷७५ मा जेठ महिनासम्म ५९ वटा घरेलु हिंसासम्बद्ध उजुरी दर्ता भएका छन् । उक्त उजुरीमध्ये प्रहरी आफैले ४१ वटा उजुरी मिलापत्र गराएको छ भने सातवटा उजुरीमा मिलापत्र गराउन नसकेपछि अदालतमा पठाएको छ । त्यसैगरी ८ वटा उजुरी कानुनी प्रक्रियामा छन् भने ३ वटा उजुरी दिएका व्यक्ति सम्पर्कमा नआएको महिला तथा बालबालिका सेवा केन्द्र इञ्चार्ज थापाले बताइन् ।