विमानको शौचालयमा जन्मियो बच्चा

विहिबार भारतको गुवाहटीबाट नयाँ दिल्ली उडेको विमानको शौचालयमा बच्चा जन्मिएको छ । विमानमा कर्मचारीहरूले अवतरण गर्ने समय हुनलाग्दा मृत शिशु फेला पारेका थिए । नवजात शिशु मृत अवस्थामा भेटिएपछि एउटी १९ वर्षीया युवतीलाई प्रहरीले पक्राउ गरेको छ । पक्राउ परेकी युवतीले आफूले बच्चा जन्माएको स्वीकारेकी छन् ।
प्रहरीका अनुसार उनले आफू गर्भवती भएको थाहै नभएको बताएकी छिन् । वरिष्ठ प्रहरी अधिकारी सञ्जय भाटियाले बीबीसीलाई बताएअनुसार ती युवतीले विमानको शौचालयमा साढे सात महिनाको भ्रुण जन्माएर भुइँमा त्यत्तिकै छोडिदिएकी थिइन् । शिशुको मृत्युको कारणबारे अनुसन्धान भइरहेको प्रहरीले जनाएको छ ।