साउन दोस्रो साता बितिसक्दा गुल्मीमा ८० प्रतिशत धान रोपाइँ सकिएको छ
गुल्मी – साउन दोस्रो साता बितिसक्दा गुल्मीमा ८० प्रतिशत धान रोपाइँ सकिएको छ ।
गत वर्ष भन्दा यसवर्ष समयमै पानी नपरेकाले धान रोपाइँ केही ढिलो भएको जिल्ला कृषि बिकास कार्यालय गुल्मीका बरिष्ठ कृषि बिकास अधिकृत चक्रपाणी पन्थीले बताए ।
साउनको पहिलो साता नै गुल्मीमा धेरै जसो भुभागमा रोपाइँ हुने गरेतापनि यस वर्ष केही ढिलाइ भएको जिल्ला कृषि बिकास कार्यालय गुल्मीले जनाएको छ ।
जिल्ला कृषि विकास कार्यालयको तथ्यांक अनुसार किसानहरुले समयमै धानको ब्याड राखेको भएपनि असारको दोस्रो साता अगाडि वर्षा नभएकाले रोपाइँ ढिलाइ भएको पन्थीले बताए ।
अझैपनि २० प्रतिशत किसानहरु आकाशे पानीको भरमा रोपाई गर्नेहरु धेरै पानीको प्रतिक्षामा छन् ।
जिल्लामा धान रोप्न योग्य १० हजार हेक्टर क्षेत्रफल जमिन मध्ये नौ हजार क्षेत्रफलमा वर्षे धान उत्पादन हुने गर्दछ भने एक हजार हेक्टर क्षेत्रफलमा चैते धान उत्पादन हुने गर्दछ ।
केही खेतमा चैते धानसहित मकै बालीसमेत लगाउने गर्दछन् । धान उत्पादनको पकेट क्षेत्र मानिएको इस्मा गाउँपालिका अम्मरपुर र मालिका गाउँपालिका अर्जेबेसी, सत्यवति र चन्द्रकोट गाउँपालिकाका ठुला फाँटलाई चिनिन्छ ।
अहिले गुल्मीमा खुमलटार, मार्सी, काठेचिन्ह्र, हर्मसराज, खुमल आठ, मन्सुरी, मनसरा, रामधान लगायत करिव एक दर्जन जातका धान उत्पादन हुने गर्दछ । यस वर्ष साउन महिनाभर सवै ठाउँमा रोपाइँ सकिने अनुमान गरिएको छ ।
जिल्लाका धेरै चैते धान हुने खेतहरु सडकका कारण अहिले बाँझो नै छन् । करिब पाँच सय रोपनी खेतमा सडकका कारण चैते रोपाइँ हुँदैन् ।