छक्कापन्जा ३ को व्यापक प्रचारमा जुट्यो निर्माण टोली

काठमाडौं । हाँस्य कलाकारहरुको टोलीले निर्माण गरेको छक्का पन्जा ३ को प्रचारमा निकै सक्रियताका साथ चलचित्र समूह लागेको छ । नेपाली नारीहरुको महान चाड तीजमा पशुपति परिसरमै कन्सर्ट गरेर प्रचारप्रसार गरेको सो चलचित्रको टोली मोफसलदेखि राजधानीकै विभिन्न कार्यक्रममा समेत पुगेर प्रचार गरिरहेको छ ।
घटस्थापनाबाट प्रदर्शनमा आउन लागेको सो चलचित्रको प्रचारका लागि नेपाल आइडलको कार्यक्रममा केही दिनअघि कलाकार दिपकराज गिरी र केदार घिमिरे (माग्नेबुढा) पुगेका थिए भने नेपाल टेलिभिजनबाट शुक्रबार प्रशारण हुँदै आएको हाँस्य सिरियल ‘भद्रगोल’मा अतिथि कलाकारका रुपमा दिपकराज गिरी र दीपाश्री निरौलाले अभिनय गरेका छन् । उनीहरुसँगै कलाकार केदार घिमिरे ‘माग्ने बुढा’ ले पनि अभिनय गरेका छन् । चलचित्र ‘छक्का पन्जा ३’को प्रचारका लागि उनीहरुले भद्रगोलमा अभिनय गरेका हुन् ।