धनगढी ब्लुजले बुटवल ब्लास्टरलाई २० रनले हरायो
काठमाडौं-पोखरा प्रिमियर लिग (पीपीएल) क्रिकेटमा एक्सपर्ट धनगढी ब्लुजले बुटवल ब्लास्टरलाई २० रनले हराएको छ ।
पोखरा रंगशालाको मैदानमा १ सय ६२ को लक्ष्य पछ्याएको बुटवलले पूरा ओभर खेल्दा ६ विकेट गुमाएर १ सय ४१ रन मात्र बनाउन सक्यो ।बुटवलका दुवै ओपनर रन आउट भएका थिए । सागर पुन १ रनमा र रोहन मुस्तफा २० रनमा आउट भए ।
चिराग सुरीले ५४ बलमा ७९ रन बनाए । भीम सार्की ५ रनमा र शंकर राना शून्यमै आउट भए । सिद्धान्त लोहनीले १२ रन बनाए ।सोमपाल कामीले १२ रन बनाए ।
धनगढीका सागर ढकालले दुई र डान लोरेन्स र कमल सिंह ऐरीले एक-एक विकेट लिए ।
यसअघि टस जितेर पहिले ब्याटिङ गरेको धनगढीले पूरा २० ओभर खेल्दै ४ विकेट गुमाएर १ सय ६१ रन बनाएको थियो ।
ओपनिङमा आएका दिलिप नाथ र सुबेन्दु पाण्डे १०-१० रनमा आउट भएका थिए । तेस्रो विकेट पिटर टे्रगो १४ रनमा आउट भए पनि चौथो विकेटका लागि दिपेन्द्र सिंह ऐरी र डान लोरेन्सले प्रतियोगिताकै सबैभन्दा धेरै १ सय ८ रनको साझेदारी गरेका थिए ।
लोरेन्स ३९ बलमा ५२ रन बनाउँदा आउट भए भने दिपेन्द्र ३९ बलमा ५६ रन बनाउँदै अविजित रहे । सौरभ खनालले ४ बलमा १३ रन बनाएका थिए ।
बुटवलका विपिन खत्रीले दुई साथै रोहन मुस्तफा र अविनाश बोहराले एक-एक विकेट लिएका थिए ।