‘पासवर्ड’ र ‘हिरो नम्बर १’ को टक्कर, कसले खाला ठक्कर !

काठमाडौं । शुक्रबार वहुप्रतिक्षीय चलचित्र ‘पासवर्ड’ प्रदर्शनमा आएको छ । त्योसँगै ‘हिरो नम्बर १’ पनि प्रदर्शन भएको छ । यसले गर्दा दुबै फिल्मको देशभर टक्कर पर्ने देखिएको छ । ‘पासवर्ड’ को धेरै समयअघिदेखि प्रचारप्रसार भएको थियो भने ‘हिरो नम्बर १’ प्रचारविनै प्रदर्शनमा आएको छ ।
ठूलो बजेट खर्चिएर निर्माण भएको ‘पासवर्ड’मा भारतीय नायिका तथा पूर्वपोर्न स्टार सन्नली लियोनीले पनि अभिनय गरेकी छिन् । ‘हिरो नं १’ ले पासवर्डको व्यापारले ठक्कर भने दिने देखिन्छ ।

पासवर्ड चलचित्रमा आइट नृत्य गरेको लियोनी बिहीबार कुमारी चलचित्र भवनमा आयोजना गरिएको प्रिमियर सहभागि हुन नेपाल आएकी थिइन् । ‘आजको साम’ बोलको गीतमा लियोनीले बोल्ड ठुम्का लगाएकी छन् । सन्नीलाई दुई सयभन्दा बढी डान्सरले साथ दिएका छन् ।
गीतमा सन्नीसँग फिल्मका लिड अभिनेता बिक्रम जोशी (विक्की), अभिनेता अनुप विक्रम शाही र कलाकार बुद्धि तामाङलाई पनि देख्न सकिन्छ । विक्रम जोशीको शब्द रहेको गीतमा अर्जुन पोखरेलको संगीत र संगीत संयोजन महाराज थापाको छ ।
प्रिमियरमा सन्नीले नेपाल संसारकै राम्रो देश भएकोले नेपाली फिल्मको हिस्सा बन्न पाउँदा निकै खुसी लागेको बताइन् ।
‘पासवर्ड’ एक्सन थ्रिलर जनरामा निर्माण भएको फिल्ममा अनुपबिक्रम शाही, बिक्रम जोशी (विक्की), बुद्धि तामाङ, छुल्ठिम गुरुङ, बिक्रान्त बस्नेत, रविन्द्र झा, प्रविण खतिवडा, लिशा सुनार, परि राना लगायतले अभिनय गरेका छन् ।
बिक्रम जोशी, हिरल जोशी र अमित बस्नेत निर्माता रहेको फिलम सम्राट बस्नेतले निर्देशन गरेका छन् ।
त्यस्तै अभिनेता जयकिशन बस्नेतले निर्माण गरेको चलचित्र ‘हिरो नम्बर १’ बस्नेत फिल्मस्को ब्यानरमा निर्माण भएको हो । निर्माता बस्नेत, एलिना रायमाझी, जाहान्वी बस्नेत, लय संग्रौला, राजीवजंग बस्नेत, संघरत्न महर्जन, शोभित बस्नेत, मदन ताम्राकार, टार्जन, शुभेच्छा थापा, प्रनिप अधिकारी लगायतका कलाकारले सो चलचित्रमा अभिनय गरेका छन् ।

कमेडी र एक्सन मिश्रित सो चलचित्रमा बिनोद सापकोटाको छायाँकन, तारावीर पाण्डे, हरि थापा र सूर्य रुम्बाको संगीत, शंकर महर्जनको द्वन्द्व एवम् सुदीप पाण्डेको सम्पादन रहेको छ ।
त्यस्तै भदौ १३ गतेबाट रिलिजमा आएको चलचित्र ‘मारुनी’ ले पनि पासवर्ड र हिरो नम्वर १ लाई केही घाटा पुर्याउने देखिन्छ । तेश्रो सातादेखि चलिरहेको यो चलचित्रप्रति पनि दर्शकको मोह घटेको छैन । नवल नेपाल निर्देशित यो चलचित्रमा साम्राज्ञी राज्यलक्ष्मी शाह, पुष्प खड्का र रेविका गुरुङ मुख्य भूमिकामा छन् । पूनम गौतम चलचित्रकी निर्मात्री हुन् ।