बुटवल–तानसेन सडक अवरुद्ध, ट्रक पुरियो

बुटवल । सिद्धार्थ राजमार्गअन्तर्गत बुटवल–तानसेन सडक खण्डको तल्लो डुम्रे नजिकै पहिरो खसेर सडक अवरुद्ध भएको छ । पहिरो खस्न रोकिँएको छैन । तानसेन नगरपालिका–८ मा पर्ने गौडेपुल नजिकै गएराति फेरि पहिरो खस्दा सडक पूर्णरुपमा अवरुद्ध भएको बताइएको छ । बिहीबार राति पनि उक्त स्थानमा पहिरो खसेको थियो ।
पहिरोले लु १ क ११७५ नम्बरको ट्रक सडकमा फसेकै अवस्थामा शुक्रबार राति पुनः पहिरो खसेपछि सडक पूर्णरुपमा अवरुद्ध भएको जिल्ला प्रहरी कार्यालय पाल्पाका प्रहरी नायब उपरीक्षक मदन गिरीले बताएका छन् ।
ट्रक पुरिँदा मानवीय क्षति भए–नभएको यकिन नभएको डीएसपी गिरीले बताएका छन् । दुई सय मिटर माथिदेखि ढुंगा, गिट्टीसहित खसेको पहिरो पन्छाउन बुटवलतर्फ र पाल्पातर्फबाट जेसीबी ल्याएर काम गर्ने तयारी भइरहे पनि सडक खुलाउन शनिबार दिनभर लाग्नसक्ने डीएसपी गिरीले बताएका छन् ।