थपिए ८१८ कोरोना संक्रमित, उपत्यकामा थप १६६ जनामा कोरोना
काठमाडौं । नेपालमा पछिल्लो २४ घण्टामा ८ सय १८ जनामा कोरोना संक्रमण पुष्टि भएको छ। आइतबार स्वास्थ्य तथा जनसंख्या मन्त्रालयले दिएको जानकारी अनुसार पछिल्लो २४ घण्टामा थपिएका ८१८ जना समेत गरी नेपालमा संक्रमित हुनेको संख्या ३१ हजार ९ सय ३५ पुगेको छ।
आज थपिएकाहरु मध्ये काठमाडौं उपत्यकामा १६६ जना कोरोना संक्रमित छन्।
काठमाडौंमा १२६, ललितपुरमा १२ र भक्तपुरमा २८ जनामा कोरोना संक्रमण पुष्टि भएको मन्त्रालयका प्रवक्ता डा जागेश्वर गौतमले बताएका छन्। योसँगै उपत्यकामा कोरोना संक्रमितको संख्या ३ हजार २सय ६२ पुगेको छ। काठमाडौंमा २ हजार ५७९, ललितपुरको ४११ र भक्तपुरमा २७२ संक्रमित छन्।
यसैवीच पछिल्लो २४ घण्टामा ८ हजार २६ जनाको पीसीआर परीक्षण भएको छ। योसँगै नेपालमा ६ लाख ४ सय ४४ जनाको पीसीआर परीक्षण भएको छ।
विगत २४ घण्टामा २ सय ८१ जना कोरोना संक्रमित निको भएसँगै नेपालमा हालसम्म १८ हजार ६३१ जना कोरोनाबाट निको भएका छन्।
त्यस्तै पछिल्लो २४ घण्टामा तीन जनाको मृत्यु भएको छ । मृत्यु हुनेको संख्या १४९ पुगेको छ ।