कोरोना संक्रमितको संख्या ५३१२०

काठमाडौं । पछिल्लो २४ घण्टामा थप १२ सय १ जनामा कोरोना भाइरसको संक्रमण पुष्टि भएको छ । शनिबार स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले दिएको जानकारी अनुुसार नेपालमा कुल संक्रमितको संख्या ५३ हजार १२० जना पुगेको छ ।
त्यस्तै शनिबार थप ८५२ जना कोरोना संक्रमित निको भएका छन् । योसँगै नेपालमा कोरोनामुक्त हुनेको संख्या ३७ हजार ५२४ पुगेको छ । प्रवक्ता गौतमका अनुसार निको हुनेको संख्या संक्रमितको ७०.६ प्रतिशत हो । देशभरमा सक्रिय संक्रमितको संख्या १५ हजार २६० रहेको छ ।
त्यस्तै शनिबार देशभर थप १४ जना कोरोना संक्रमितको मृत्यु भएको छ । यो समेत गरेर कोरोना भाइरसबाट मृत्यु हुनको संख्या ३३६ जना पुगेको छ ।
त्यसैगरी शनिबारसम्म काठमाडौँ उपत्यकामा कोरोना भाइरसबाट संक्रमित हुनेको संख्या ११ हजार १३९ पुगेको छ । उनीहरु मध्ये काठमाडौंमा ९ हजार १ सय ३, ललितपुरमा १ हजार १ सय २९ र भक्तपुरमा ९०७ संक्रमित पुगेका छन् ।
शनिबार ४३१ जनामा कोरोना भाइरसको संक्रमण पुष्टि भएको थियो । शनिबार काठमाडौँमा ३७७, भक्तपुरमा १७ र ललितपुरमा ३७ जनामा कोरोना संक्रमण पुष्टि भएको हो ।