प्रधानाध्यापकको घाँटी रेटी हत्या

काठमाडौं । मोरङको मिक्लाजुङ गाउँपालिका १ बर्खेका शिक्षक राजेन्द्र श्रेष्ठको घाँटी रेटेर हत्या भएको खुलासा भएको छ।
आज विहान सो घटना भएपनि प्रहरी भने अपरान्हतिर मात्र घटनास्थलमा पुगेको थियो । प्रहरीले श्रेष्ठको अगाडिबाट घाँटी रेटेर हत्या भएको पाइएको जनाएको छ ।
यसअघि स्थानीयले जंगलमा शव फेला पारे पनि लुगाले ढाकिएका कारण छोएका थिएनन् । स्थानीय सरस्वती आधारभूत विद्यालयका प्रधानाध्यापक श्रेष्ठलाई अपरिचित व्यक्तिहरुले अपहरण गरी सोही गाउँपालिका–१, बर्खे गाउँस्थित जंगलमा लगेर हत्या गरेको अवस्थामा स्थानीयले फेला पारेका थिए । स्थानीयले खबर गरेपछि प्रहरी घटनास्थलतर्फ गएको थियो ।
बिकट र गाडीसमेत नजाने ठाउँ भएकाले पुग्न ढिलाइ भएको प्रहरीले जनाएको छ।
दुवै हात बाँधी अगाडिबाट घाँटी रेटेर हत्या भएको अवस्थामा उनको शव फेला पारेको प्रहरीले जनाएको छ। घटनामा संलग्न व्यक्तिहरुको खोजी कार्य भइरहेको मोरङ प्रहरीले जनाएको छ।