प्रधानमन्त्रीलाई संसद विघटनको अधिकार छैन : सभामुख सापकोटा

काठमाडौं । सभामुख अग्नि सापकोटाले अहिलेकै अवस्थामा प्रधानमन्त्रीले संसद विघटन गर्ने अधिकार नभएको बताएका छन् ।
नेकपा (प्रचण्ड–माधव समूह) को अनेमसंघ, नेपाली कांग्रेस सम्बद्ध नेपाल महिला संघ, जनता समाजवादी सम्बद्ध समाजवादी महिला संघ र विवेकशिल साझा पार्टी सम्बद्ध विवेकशील साझा महिलाको संयुक्त ज्ञापनपत्र बुझ्दै सभामुख सापकोटाले आफू संविधानको रक्षाका लागि खेल्नुपर्ने भूमिकाबारे सबै पक्षसँग परामर्श लिइरहेको पनि बताएका छन् ।
संविधानले यही परिस्थितिमा प्रधानमन्त्रीलाई प्रतिनिधिसभा विघटन गर्ने अधिकार नदिएको वताउँदै सभामुख सापकोटाले अदालतमा पनि त्यहीअनुसारको प्रतिउत्तर दिने बताएका छन् ।
संविधानको रक्षा तथा देश र जनताको अधिकतम हितमा सधैं समर्पित हुने वताउँदै सापकोटाले भने, ‘अहिले सभामुखको जिम्मेवारीको हिसाबले मेरो भूमिका के हुन्छ, संविधानको रक्षाका लागि, समग्र परिस्थितिमा मैले कसरी भूमिका खेल्न सक्छु, जनताको अधिकतम हितका लागि के भूमिका खेल्नुपर्छ भनेर मैले राष्ट्रका सम्बद्ध पक्षसँग वृहत, व्यापक परामर्श राय सल्लाह सुझाव लिइरहेको छु ।’