गुल्मीको खाम्सेपानीमा स्थानीयको एक गोठमा आगलागी, पशुचौपाय सहित गोठ जलेर क्षति
गुल्मीको रेसुङ्गा नगरपालिका खाम्सेपानीमा स्थानीयको एक गोठमा आगोलागी हुँदा पशुचौपायको क्षति भएको छ । गएराति करिब १२ः३० बजे रेसुङ्गा नगरपालिका–५का कृष्ण बहादुर कुँवरको टिनले छाएको गोठमा आगोलागी हुँदा गोठमा रहेका एक वटा भैसीको भाडा तथा ७ वटा बाख्रा जलेर मरेका छन् ।
भैसीलाई कुडो पकाउने क्रममा एक्कासी आगो लागी हुँदा गोठ जलेर पूर्ण रुपमा क्षति भएको छ । गोठमा रहेको एउटा भैसी, २ वटा बाख्रा घाईते भएका छन् । मानवीय क्षति भने नभएको जिल्ला प्रहरी कार्यालय गुल्मीका प्रहरी नायब उपरिक्षक केदारराज पन्तले जानकारी दिनुभयो ।
आगो प्रहरी र स्थानियहरुको सहायोगमा नियन्त्रणमा आएको पन्तले जानकारी दिनुभयो । आगलागी भएको खबर प्राप्त गरे लगत्तै प्रहरी हवल्दार लाल बहादुर नेपालीको कमाण्डमा ५ जनाको टोली खटिएर गएको थियो ।