कोरोना संक्रमित १०४ थपिए, ६३ निको

काठमाडौं । पछिल्लो २४ घन्टामा कोरोना भाइरसका १०४ जना नयाँ सङ्क्रमित थपिएका छन् । तीन हजार ४८८ जनाको आरटीपीसीआर परीक्षण गरिएकोमा १०४ जनामा सङ्क्रमणको पुष्टि भएको छ ।
स्वास्थ्य तथा जनसंख्या मन्त्रालयका अनुसार थपिएका सङ्क्रमितसँगै नेपालमा कोरोनाका कुल सङ्क्रमितको संख्या दुई लाख ७४ हजार ९७४ पुगेको छ ।
पछिल्लो चौबीस घण्टामा ६३ जना सङ्क्रमित निको भएका छन् । हालसम्म दुई लाख ७१ हजार ५० जना सङ्क्रमित निको भएका हुन् । सङ्क्रमित निको हुने दर ९८.६ प्रतिशत पुगेको छ । हालसम्म २२ लाख तीन हजार ४३८ जनाको आरटीपीसीआर परीक्षण गरिएको छ ।
मन्त्रालयका अनुसार हाल ९११ जनामा भाइरसको सङ्क्रमण सक्रिय छ भने ५५ जना क्वारेन्टिनमा रहेका छन् । पछिल्लो २४ घण्टामा कसैको पनि मृत्यु भएको छैन । हालसम्म कोरोना भाइरसको सङ्क्रमणबाट तीन हजार १२ जनाको मृत्यु भइसकेको छ ।