ग्लोबल आइएमई बैङ्क शाखा तम्घासद्वारा महेन्द्र मावि गुल्मीलाई फूटवल जर्सी हस्तान्तरण
महेन्द्र माध्यमिक विद्यालय रेसुङ्गा नगरपालिका –१ चिदिचौर तम्घास गुल्मीलाई फूटवल जर्सी हस्तान्तरण गरिएको छ । ग्लोबल आइएमई बैङ्क शाखा तम्घासद्वारा विद्यालयलाई फूटवल जर्सी हस्तान्तरण गरिएको हो ।
बैङ्कको शाखा कार्यालय गुल्मीका प्रबन्धक योगेन्द्र रायमाझीले १८ थान जर्सी विद्यालय व्यवस्थापन समिति अध्यक्ष शालिकराम पन्थी, प्रधानाध्यापक युवराज ज्ञवाली र खेल शिक्षक जंगबहादुर थापालाई हस्तान्तरण गर्नुभएको हो । विद्यालयको आग्रहमा उक्त जर्सी बैङ्कले उपलब्ध गराएको हो । फूटवल जर्सी हस्तान्तरण गर्दै बैङ्कका प्रबन्धक योगेन्द्र रायमाझीले सानो भएपनि सहयोग गर्न पाएकोमा खुसी व्यक्त गर्नुभयो ।
बैङ्कले आर्थिक कारोबार मात्र नभएर सामाजिक एवं शैक्षिक कार्यलाई प्रोत्साहन गर्ने हेतुले उक्त जर्सी उपलब्ध गराएकोमा बैङ्कलाई विद्यालय व्यवस्थापन समिति अध्यक्ष र प्रधानाध्यापकले धन्यवाद ज्ञापन गर्नुभएको थियो ।
मंगलबार देखि तम्घासको चिदिचौरमा खेल मैदानमा शुरु भएको माध्यमिक विद्यालयस्तरीय फूटवल प्रतियोगितामा महेन्द्र माध्यमिक विद्यालयका विद्यार्थीहरु सोही जर्सीमा फूटवल खेल खेल्ने खेल शिक्षक जंगबहादुर थापाले जानकारी गराउनुभयो ।
फूटवल जर्सी हस्तान्तरण कार्यक्रममा रेसुङ्गा नगरपालिका वडा नम्बर–१ का वडाध्यक्ष अखिलेश्वरप्रसाद पाण्डेय, वडा नम्बर–३ का वडाध्यक्ष थम्मन बहादुर के.सी. शिक्षक अभिभावक संघ अध्यक्ष डम्बर पाण्डे, विद्यालय व्यवस्थापन समिति सदस्य घनश्याम पाण्डे, शिक्षक अभिभावक संघ सदस्य मोनिका कुँवर, रेसुङ्गा नगरपालिका गुल्मीका सव इन्जिनियर चक्र के.सी.र विद्यालयका शिक्षक तथा कर्मचारीको उपस्थिति रहेको कार्यक्रमको संचालन सहायक प्रध्यानाध्यापक कृष्णप्रसाद मरासिनीले गर्नुभएको विद्यालयका लेखापाल शालिकराम पन्थीले जानकारी दिनुभयो ।