वैवाहिक सम्बन्ध तोडेका अञ्जु पन्त र मनोजराज शिवाकोटीले सांगीतिक सहयात्रा

काठमाडौं । धेरै वर्षअघि वैवाहिक सम्बन्ध टुंग्याएका अञ्जु पन्त र मनोजराज शिवाकोटीले सांगीतिक सहयात्रा भने पुनः जोडेका छन् ।
दसकभन्दा लामो समयपछि उनीहरूले सँगै गीत गाएका हुन् । उनीहरूले सँगै गाएको गीतको बोल हो– तिमी आयौ जिन्दगीमा । जसको म्युजिक भिडिओ भर्खरै सार्वजनिक भएको छ ।
सुरेश वाग्लेका शब्द रहेको गीतमा मनोजराजले संगीत भरेका हुन् । सुव्रतराज आचार्यको निर्देशनमा बनेको भिडिओमा गीतकार वाग्ले र उनकी पत्नी प्रमिला कार्की फिचर्ड छन् । उत्सव दाहालले छायांकन गरेको भिडिओलाई विकास दाहालले सम्पादन गरेका हुन् । एक छोरीकी आमा पन्तले हालै थिर कोइरालासँग विवाह गरेकी छन् ।
गायिका पन्तले गायक तथा संगीतकार मनोजराजसँग एक दसकअघि सम्बन्ध–विच्छेद गरेकी थिइन् । उनीहरूकी एक छोरी छन्– परितोषिका पन्त । उनी पनि मोडलिङ क्षेत्रमै प्रवेश गरिसकेकी छन् । छोरीकै विशेष आग्रहमा गायिका पन्तले दोस्रो बिहे गरेको बताइएको छ ।