वाम एकताका लागि नेकपा एसले बनायो कार्यदल

काठमाडौं । नेकपा एकीकृत समाजवादीले वाम एकताको पहलका लागि कार्यदल गठन गर्ने निर्णय गरेको छ ।
पार्टी कार्यालय तीनकुनेमा बिहीबार बसेको समाजवादीको सचिवालय बैठकले वाम एकताको पहलका लागि महासचिव बेदुराम भुसालको संयोजकत्वमा चार सदस्यीय कार्यदल गठन गरेको प्रवक्ता जगन्नाथ खतिवडाले जानकारी दिएका छन् । कार्यदलमा गंगालाल तुलाधर, विजय पौडेल र प्रकाश ज्वाला रहेको उनले बताएका छन् ।
प्रवक्ता खतिवडाले आफ्नै पार्टीको नेतृत्वमा एकताका लागि पहल हुने भन्दै कार्यदलले सबै वामपन्थीहरुसँग छलफल र परामर्श गर्ने बताए । त्यस्तै उनले कसैबाट औपचारिक प्रस्ताव नआएको अवस्थामा सरकारको बिषयमा निर्णय गर्न आवश्यक नरहेको जिकिर गरेका छन् ।
एमालेकै आड भरोसामा सरकारको नेतृत्व प्रचण्डले गरेको र एमालेको अहिलेसम्मको दृष्टिकोण हेर्दा आफ्नो पार्टीको साथ नचाहिएको देखिएको उनले बताएका छन् ।
प्रवक्ता खतिवडाले प्रधानमन्त्री प्रचण्डसंग अध्यक्ष माधव नेपालले गरेको भेट निजी भएको र त्यसको औपचारिक जानकारी नरहेको स्पष्ट पारेका छन् ।