नेपाल बार एसोसिएसनमा मिश्र नेतृत्वको प्यानल नै विजयी

काठमाडौं । नेपाल बार एसोसिएसनको नयाँ नेतृत्वमा कांग्रेस–एमाले प्यानलका विजयप्रसाद मिश्र नेतृत्वको प्यानलै विजयी भएको छ । अध्यक्षमा मिश्र ५०५२ मतसहित विजयी हुँदा उनका निकटतम प्रतिस्पर्धी विपक्षी गठबन्धनबाट भिडेका माओवादीनिकट कानून व्यवसायी रमन श्रेष्ठले २६२१ मत मात्र ल्याए ।

अध्यक्षमै उमेदवारी दिएका राजु कैतीले ४८, उज्वल घिमिरेले ४५ र आशिष पौडेलले ५४ मत ल्याए ।

त्यस्तै महासचिवमा कांग्रेस–एमाले प्यानलका केदारप्रसाद कोइराला ४८७४ भोट ल्याएर विजयी हुँदा विपक्षी गठवन्धनका रास्वपा निकट कानून व्यवसायी यज्ञमणि न्यौपानेले २३६७ भोटमात्र ल्याएका छन् । अर्का उमेदवार हरिशरण कार्कीले २४० मत पाएका छन् ।

यसैगरी, उपाध्यक्षमा पनि महिलासहित सबै प्रदेशबाट मिश्रकै प्यालन निर्वाचित भएको छ । उपाध्यक्ष कोसी प्रदेशमा पदमप्रसाद लिम्बुले पाँचहजार २०० मत पाएर निर्वाचित भए । उनीसँग पराजित भएका कर्णबहादुर राईले दुईहजार ११६ मत पाए ।

उपाध्यक्ष मधेस प्रदेशमा निर्वाचित अजयशंकर झाले पाँचहजार २५२ मत ल्याए । अर्का प्रत्याशी प्रमोदप्रसादले दुईहजार २० मत पाए ।

उपाध्यक्ष वाग्मती प्रदेशमा निर्वाचित तेजबहादुर रावलले पाँचहजार ६ मत ल्याए । अर्का प्रत्याशी डकेन्द्रप्रसाद सुवेदीले दुईहजार ४५६ पाएका छन् । गण्डकी प्रदेश उपाध्यक्षमा निर्वाचित भूपेन्द्र खनालले पाँचहजार ५६ मत ल्याउँदा सुकदेव गौतमले दुई हजार २३२ मत पाएका छन् ।

यस्तै, लुम्बिनी प्रदेश उपाध्यक्ष निर्वाचित कृष्णप्रसाद पोख्रलेले पाँचहजार १६७ मत ल्याउँदा अर्का प्रत्याशी तीर्थराज ज्ञवालीले दुईहजार ८० मत ल्याए । कर्णली प्रदेश उपाध्यक्षमा निर्वाचित विवशकुमार बस्नेतले पाँचहजार ४४ मत ल्याए । अर्का प्रत्याशी धर्मराज न्यौपानेले दुईहजार १८४ मत पाए ।

सुदूरपश्चिम प्रदेश उपाध्यक्षमा निर्वाचित सिद्धराज ओझाले पाँचहजार १५१ मत पाए । प्रतिस्पर्धी पदमराज शर्माले दुईहजार ६४ मत ल्याएका छन् ।

महिला उपाध्यक्षमा निर्वाचित सरस्वती श्रेष्ठले चारहजार ६२० मत ल्याइन् । प्रतिस्पर्धी बिना श्रेष्ठले दुईहजार ७६७ मत पाएकी छन् । बिना हार्ने टिमबाट सबैभन्दा बढी मत ल्याउने उमेदवार बनेकी छन् ।

कोषाध्यक्ष निर्वाचित जगतबहादुर कार्कीले पाँचहजार ८७ मत पाएका छन् । अर्का प्रत्याशी दीपक राईले एकहजार ९५० मत ल्याएका छन् । कोषाध्यक्षका अर्का उमेदवार विष्णुप्रसाद सापकोटाले ३२७ मत पाएका छन् ।

यसैगरी, खुलातर्फ सदस्यमा किरण न्यौपाने पाँचहजार १७८ मत, शारदा गुरुङ पाँचहजार १७६, दमनबहादुर चन्द पाँचहजार ६, मुकुन्द अधिकारी पाँचहजार ४५, बाबुराम अर्याल चारहजार ८७५ र माधव मैनाली चारहजार ८० मतसहित निर्वाचित भए । महिला खुलातर्फ रञ्जिता कार्की चारहजार ६३७ मतसहित निर्वाचित भएकी छन् ।

दलित कोटामा चिरञ्जीवी तिल्क्यानी चारहजार ७३७, मधेसी/मुस्लिमतर्फ (उपत्यकाबाहिर) सूर्यकुमार यादव चारहजार ७१८, मधेसी/मुस्लिम (खुलातर्फ) रिंकुकुमारी यादव पाँचहजार २३०, आदिवासी जनजाति (उपत्यकाबाहिर) राजकुमार श्रेष्ठ पाँचहजार ७२, आदिवासी जनजाति (खुलातर्फ) मंगलसुन्दर शिल्पकार चारहजार ९४३, महिला (उपत्यकाबाहिर) अधिवक्ता इन्दिरा आचार्य पाँचहजार २५१, केन्द्रीय सदस्य (उपत्यकाबाहिर) किरण पौडेल पाँचहजार १४८ मतसहित निर्वाचित भएका छन् ।

शनिबार भएको बारको चुनावमा ९९५७ मतदातामध्ये करिब ८० प्रतिशत मतदान भएको थियो । मतदानका लागि काठमाडौं र बाहिर गरी ३६ केन्द्र तोकिएको थियो । सवै मतदान केन्द्रको मतपत्र काठमाडौंमा ल्याएर गणना गरिएको थियो । आज मत गणना सम्पन्न भएको हो ।

नवनिर्वाचित अध्यक्ष मिश्रले बारमा सवैलाई समेटेर एकजुट भएर अघि बढ्ने बताउँदै स्वतन्त्र न्यायपालिका वास्तविक रूपमा स्थापित गर्न र स्वच्छ न्यायपालिकाको स्थापनाका लागि पहल गर्ने प्रतिवद्धता जनाएका छन् । मिश्रले लयर्स एकेडेमीको स्थापनामार्फत कानून व्यवसायीहरुको अध्ययन प्रशिक्षण तथा तालिमका लागि पर्याप्त अवसरको योजना तर्जुमाका लागि पहल गर्ने पनि बताएका छन् ।