‘रातो टीका निधारमा’ अशोक परिवार हावी

काठमाडौं । अशोक शर्माको निर्देशनमा निर्माण भएको चलचित्र ‘रातो टीका निधारमा’ असोज १० गतेबाट प्रदर्शनमा आउने भएको छ । चलचित्रमा शर्माका परिवार नै हावी देखिएका छन् । यो चलचित्रमा अशोकका छोरा अंकित शर्मा नायक छन् भने छोरी कृति सहायक निर्देशक छिन् । निर्देशक शर्माकी श्रीमती किरन शर्मा र छोरी कृति शर्माले चलचित्रको निर्माण गरेका हुन् ।
मंगलबार सार्वजनिक ट्रेलरमा चलचित्रको मुख्य पात्रको रुपमा रहेकी अभिनेत्री साम्राज्ञी राज्य लक्ष्मी शाहको गाउँकी एक शिक्षिकाको भूमिका निर्वाह गरेको देखिन्छ । त्यस्तै नायक अंकित बैदेशीक रोजगारीमा पठाउने एजेन्टको रुपमा देखिएका छन् ।
चलचित्रमा अंकित र साम्राज्ञीसँगै नीता ढुंगाना, रविन्द्र झा, बुद्धि तामाङ, खुश्बु खड्का, राजाराम पौडेल, शिवहरी पौडेल, लक्ष्मी गिरी, बसुन्धारा भुषाललगायतका कलाकारहरूको अभिनय रहेको छ । चलचित्रमा शम्भुजित बाँस्कोटा र कल्याण सिंहको संगीत छ । चलचित्रमा दुई दशक अघिको हिट चलचित्र ‘अल्लारे’मा समावेश ‘रातो टीका निधारमा’लाई रिएरेन्ज गरेर राखिएको छ । चलचित्रको नाम पनि यसै गीतबाट लिइएको छ ।
गीतमा प्रमोद खरेल, मेलिना राई, निशान भट्टराई र अस्मिता अधिकारीले आवाज भरेका छन् । चलचित्रका लागि सहदेव ढुंगाना, डा.कृष्णहरि बराल र रवि मल्लले गीत लेखेका छन् ।