‘छ माया छपक्कै’ले ५१ दिन मनायो

काठमाडौं । चलचित्र ‘छ माया छपक्कै’ले काठमाण्डौका आधा दर्जन हलमा ५१ दिन मनाएको छ । चलचित्रको निर्माणपक्षले ५१ दिनसम्म चलचित्र रिलिज भएकोमा दर्शकलाई धन्यवाद समेत दिएको छ ।
असोजको २४ गतेबाट प्रदर्शनमा आएको यो चलचित्रले गोपी, गुण, गंगा, बीएसआर, अष्टनारायण र सीडीसी हलमा ५१ दिन पुगेको छ । चलचित्र अझै खचाखच दर्शककाबीच चलिरहेको छ । कतिपय दर्शकले त दोहोर्याएर हेरेको समेत बताएका छन् ।
रोहित अधिकारी र आमा सरस्वती मुभिजको निर्माणमा तयार भएको दिपेन्द्र लामाले निर्देशन रहेको छ माया छपक्कै यो बर्षकै सर्वाधिक ग्रस कमाउन सफल चलचित्रको रुपमा हेरिएको छ ।
गाउँको राजनीतिक बिषयलाई मुख्य कथा बनाएको यो चलचित्रमा दिपकराज गिरी, केदार घिमिरे, जितु नेपाल, केदार घिमिरे, सुपुष्पा भट्ट लगायतका कलाकारको मुख्य भूमिका रहेको छ ।
दिपकराज गिरी र उनको टिमले ५१ दिन मनाउने चलचित्रको सूचीमा दोहोरो ह्याट्रिक नै गरेको हो । यसअघि यो टिमले बनाएका ‘६ एकान ६, वडा नम्बर ६, छक्का पन्जा, छक्का पन्जा २ र छक्का पन्जा ३’ले पनि ५१ दिनको सफल यात्रा पार गरेका थिए । जसमध्ये, ‘छक्का पन्जा’ले एक सय दिन समेत पूरा गरेको थियो ।