युएईबाट १ सय ६८ जना नेपाली काठमाडौं आइपुगे

काठमाडौं । युएईबाट १ सय ६८ जना नेपाली आज काठमाडौं आइपुगेका छन् । एयर अरबियाको जहाजबाट उनीहरु काठमाडौं आइपुगेका हुन ।
कोरोना भाइरसको महामारीका कारण घर फर्किएका नेपाली लिएर एयर अरबियाको जी नाइन १७९१ नम्बरको जहाज त्रिभुवन अन्तर्राष्ट्रिय विमानस्थलमा अवतरण गरेको हो।
विमानस्थल कार्यालयका प्रवक्ता देवचन्द्रलाल कर्णले सो विमानमा १६८ जना नेपाली आएको बताएका छन्।
उक्त जहाज दिउँसै आउने भनिए पनि नेपाली दूतावास र एयरलाइन्सबीच समन्वय नहुँदा जहाज उडानमा ढिलाइ भएको थियो।
उनीहरुलाई अब विमानस्थलबाट प्रदेश अनुसार होल्डिङ सेन्टरमा लगिएको छ । होल्डिङ सेन्टरसम्म पुर्याएर राखेपछि सम्बन्धित प्रदेशको जिम्मा लगाइने बताइएको छ। हरेक प्रदेशका लागि एक एक जना मन्त्रीलाई समन्वयको जिम्मा दिइएको छ।
यसअघि आजै बिहान म्यानमारबाट २६ जना नेपाली फर्किएका छन्। उनीहरु आजै घर फर्किएको नेपाली सेनाले जनाएको छ।