युवती विवादमा ज्यान गयो
काठमाडौँ । काठमाडौँको मनमैजुमा युवतीको विषयलाई लिएर एक युवकले ज्यान गुमाएका छन । दोलखाका दोर्जे तामाङ्गको छुरा प्रहारबाट लक्ष्मण तामाङ्गको हत्या भएको छ ।
मनमैजुको एउटा खाजाघरमा दोर्जेको समूह खाजा खाँदै थियो । त्यसको केहीबेरमा नुवाकोट घर भएका लक्ष्मण तामाङको समूह त्यहाँ पुग्यो । एकैछिनमा दुई पक्षबीच भनाभन भयो । दोर्जे समूहले छुराले प्रहार गरि २४ वर्षीय लक्ष्मणको ज्यान लिए ।
शुक्रवार साँझ भएको सो हत्या ‘युवती विवाद’का कारण भएको प्रहरीले जनाएको छ । लक्ष्मण र दोर्जे समूहको बिचमा ‘पुरानो प्रेमिका’को बारेमा विवाद भएको हत्याबारे अनुसन्धान गरिरहेका एक प्रहरी अधिकृतले जानकारी दिए । यस विषयमा उनीहरुबिच पहिले देखिनै सामान्य विवाद भएको थियो ।
हत्यामा संलग्न मुख्य आरोपी पक्राउ परेका छैनन् । सोधपुछका लागि तीनजना युवलाई पक्राउ गरिएको महानगरीय प्रहरी परिसर काठमाडौंले जनाएको छ ।
दुईपक्ष झडप हुँदा दोर्जेले खाजाघरबाट लखेट्दै मितेरी पुल नजिक पुगेपछि लक्ष्मणलाई छुरा हानेको बताइएको छ ।यसबारे प्रहरीले अनुसन्धान गरिरहेको छ ।