तीन म्यानपावर कम्पनीमा छापा

काठमाडौं । वैदेशिक रोजगार विभागले ३ वटा म्यानपावर कम्पनीमा छापा मारेर कागजात र कम्प्यूटर जफत गरेको छ ।
विभागले स्काई अफ द वल्र्ड म्यानपावर प्रालि, इम्पावर ह्युमन रिसोर्स म्यानेजमेन्ट प्रालि र सुर्खेत ओभरसिज प्रालिमा छापा मारेको वैदेशिक रोजगार विभागका महानिर्देशक कुमार प्रसाद दाहालले बताएका छन् ।
वैदेशिक रोजगारीका लागि भन्दै भिजिट भिसामा श्रमिक पठाउन लागेको सूचना आएपछि छापा मारेको दाहालले बताएका छन् ।
विभागले इम्पावर ह्युमन र स्काई अफ द वल्र्ड म्यानपावरबाट श्रमिकका पासपोर्ट, कम्प्युटर, विभिन्न कागजात नियन्त्रणमा लिएको छ। तर, सुर्खेत ओभरसिजका कर्मचारी भने अनुगमन टोली नपुग्दै कार्यालय बन्द गरेर हिँडेको पाइएको छ।
ती म्यानपावर कम्पनीलाई उचित जवाफसहित तत्काल विभागमा उपस्थित हुन पत्र काटिएको बताइएको छ ।