स्वार्थको गठबन्धन रोज्ने की सुदृढ राष्ट्रिय शक्ति निर्माण गर्ने एमाले ? : ओली

झापा । नेकपा एमालेका अध्यक्ष केपी शर्मा ओलीले एमालेलाई पराजित गर्ने हिम्मत कसैसंग नरहेको भन्दै एमालेसंग डराएर सबै दल मिलेर गठबन्धन बनाउनुपरेको बताउनुभएको हो ।
बिहीबार झापा क्षेत्र नं १ मा आयोजित चुनावी सभालाई सम्बोधन गर्दै ओलीले अब स्वार्थको गठबन्धन रोज्ने की सुदृढ राष्ट्रिय शक्ति निर्माण गर्ने एमाले भन्ने फैसला निर्वाचनले गर्नुपर्ने जिकिर गर्नुभयो । राष्ट्रियता, स्वाभिमान कमजोर पार्नका लागि र देशको बिकास रोक्न धेरै षडयन्त्र भइरहेको भन्दै उहाले मंसिर ४ को निर्वाचनले यसको फैसला गर्नुपर्ने बताउनुभयो ।
उहाँले सरकारमा पुगेर गलत काम गर्न खोजेपछि नागरिकताका बिषयमा राष्ट्रपतिले राष्ट्रको पक्षमा काम गरेको जिकिर गर्नुभयो । ओलीले एमाले सरकारले आवश्यक कानून बनाएर एक महिनाभित्रै नागरिकता प्रदान गर्ने धारणा राख्नुभयो ।
उहाँले तालमेल गरेका स्थानमा एमालेले राप्रपालाई बिजयी गराउने भन्दै राप्रपाले पनि एमालेलाई जीत दिलाउने धारणा राख्नुभयो ।