एमाले बागमती अधिवेशन : आज मनोनयन

काठमाडौं । नेकपा एमालेको बागमती प्रदेशको जारी अधिवेशनमा आज मनोनयन दर्ता हुँदै छ । निर्वाचनका लागि बिहान ८ बजे मतदाता नामावली प्रकाशन गरिने भएको छ । अन्तिम नामावली ९ बजे प्रकाशित हुने छ । बिहान ९ बजेदेखि ११ बजेसम्म उम्मेदवारी दर्ता हुनेछ ।

अपराह्न ४ बजे उम्मेदवारको नामावली प्रकाशन हुनेछ । ५ बजे अन्तिम नामावली प्रकाशन गर्ने निर्वाचन कार्यतालिका छ । बिहीबार बिहान ११ बजे मतदान हुने तय भएको स्थायी कमिटी सदस्य तथा निर्वाचन मण्डलका सदस्य शेरबहादुर तामाङले जानकारी दिनुभयो । अधिवेशनमा १ हजार १७४ प्रतिनिधि चयन भएका छन् ।
बागमती प्रदेश अध्यक्षका लागि कृष्ण दाहाल, केशव पाण्डे, कृष्णभक्त पोखरेल, कैलाश ढुंगेल, सानु श्रेष्ठ, रचना खड्कालगायतको दाबी छ ।