डरलाग्दो ज्यादतीः महिलालाई जलाउनेदेखि पानीमा विषसम्म

गुल्मी । लामो समय देखि गुल्मीकी एक महिलाले अज्ञात ब्यक्तिबाट डर लाग्दो ज्यादती खेप्दै आएकी छन् । रेसुङ्गा नगरपालिका वडा नम्वर–१० सिमिचौरकी ३३ बर्षिया गोमा पाण्डेले २०६२ साल देखि गएराती सम्म पटक पटक ज्यानै लिने गरी अज्ञात ब्यक्तिको ज्यादती खेप्दै आएकी हुन् ।
२०५८ सालमा उनको छिमेक नजिकै पर्ने अर्घाखाँचीको काउलेबाट विवाह भएको थियो । त्यसको चार बर्ष पछि पटक पटक उनिमाथी अज्ञात ब्यक्तिले ज्यादती गर्दै आएको छ । हरेक घटनाको प्रकृति हेर्दा ज्यादती गर्ने ब्यक्ति एउटा मात्र देखिन्छ ।
गत ६ वर्ष देखि दुवईमा कार्यरत रहेका र बर्षेनी घर आवत जावत गरी रहेका उनका श्रीमान गणेश पाण्डे विवाह गर्ने ताका भारतमा काम गर्थे । विवाह पछि उनि पनि श्रीमान संगै भारतमा गएर बसुञ्जेल सम्म कसैले केहि गरेको थिएन । जब घर आईन् तब सुरु भयो ज्यादती ।
घटना नम्वर १– २०६२ सालमा उनि सुत्ने कोठामा अज्ञात ब्यक्तिले आगो लगाई दियो । संयोगले त्यस दिन माईती गएको बेला परेकोले उनि बाँचेकी थिईन् । तर उनको कोठाको हजारौं मुल्य बराबरको सामग्री जलेर नष्ट भयो । प्रहरीकहाँ उनि अनुसन्धान गरी पाउँ भनि आईन् । प्रहरी घटना स्थलमा पुग्यो तर पत्ता लगाउन सकेन ।
घटना नम्वर–२– २०६५ सालमा उनको घरको गाग्री र ताउलाको पानीमा विष राखी दियो । ताउलाको पानी खानासाथ भैसी म¥यो । त्यो थाह पाए पछि उनले गाग्रीको पानी प्रयोग नगरेर बँचिन् । त्यति बेला पनि प्रहरीमा उजुरीका नाममा उजुरी मात्रै हुन पुग्यो ।
घटना नम्वर–३ – २०६९सालमा उनको पाँच सय लिटरको पानी ट्याङ्की धारिलो हतियारले धुजाधुजा पारेर फुटाई दियो । त्यति वेला पनि प्रहरी आयो गयो मात्रै । उजुरीका लागि प्रहरीमा आउनु धाउनु मात्रैको सास्तीमा परिन् उनि ।
घटना नम्वर ४– २०७४ साल जेठमा उनको गोठ आगो लगाएर जलाईयो । पुरै नष्ट भयो । दुई वटा बाख्रा जलेर मरे । गोमाको अनुहार पनि जल्यो । त्यति वेला पनि प्रहरी गयो आयो मात्रै ।
घटना नम्वर ५– हालै फेरी उनको हजार लिटरको पानी ट्याङकी जलाएर नष्ट पारिएको छ । अहिले उनि रुँदै जिल्ला प्रहरी कार्यालयमा आएकी छन् । एउटै महिलालाई पाँच पटक सम्म ज्यान लिने नियत सम्म अन्य दर्जनौ पटक अन्य क्षति र हिंसाका घटना भई रहँदा प्रहरीले हाल सम्म किन यस्तो वेवास्ता ग¥यो यो एउटा छलफल बहसको बिषय बन्ला नै । यो पछिल्लो घटनाले अब प्रहरी प्रति सवैको ध्यान जाने भएको छ ।
उनका ति आँशु प्रति अब होला प्रहरी गम्भीर ?
उनि भक्कानिदै प्रहरीमा पटक पटक भोगेका ज्यादती ब्यक्त गर्दै थिईन् । त्यति बेला एक जना प्रहरी अधिकारी भन्दै थिए मान्छे पत्ता लगाउन तपाईहरुले नै सहयोग गर्नु पर्छ । उनि रुँदै भन्छिन्–‘म पटक पटकका घटनामा प्रहरी कहाँ आएर आफु सुरक्षित हुन नसकेको निवदेन गरें । तर, म सुरक्षित हुन सकिन ।’
अक्षर नचिनुन् भनेर बायाँ हातले लेखे जस्तो लाग्ने एउटा पत्र लेखेर उनको घरमा फालिएको छ । त्यसमा विदेशमा रहेका उनका श्रीमान पाण्डेलाई उक्साउने र घर फुटाउने नियतका साथ उनको चरित्र हत्या गरिएको छ । तेरी स्वास्नीले दुई तिन वटा गर्भ फाली सकि भनेर लेखिएको छ ।
गत वर्ष श्रीमान आउँदा रातीमा त्यो कागज फालिएको थियो उनले रुँदै भनिन् श्रीमान घर आउँदा लेखेको त्यो पत्रमा मेरा दुई छोरा छोरी मारेर फाली दिने धम्की समेत दिईएको छ ।
कहिले खानेपानीको पाईप काटी दिने, कहिले भित्ते लेखन गरेर उनको चरित्र हत्या गरी दिने । यावत ज्यादती सहँदै आएकी उनि अहिले यो पछिल्लो घटनाले घरबाटै विस्थापित हुने अवस्थामा पुगेकी छन् । त्यस पत्रमा उनले आश्था राख्ने पार्टी नेपाली कांग्रेसलाई समेत ईङ्गित गर्दै भनिएको छ तेरी स्वास्नी कांग्रेसकी नेता हुँ भन्दै हिड्छे ।
उनि थप्छीन् –‘ उसले मेरो जुन सुकै क्रियाकलाप थाहा पाउँछ । म मेरो घर भित्र जे खाएकी छु, जे लगाएकी छु, जहाँ हिडेकी छु, सबै सबै कुरा थाहा पाउँछ । जुन कुरा उसले सधैँ कागजको पानामा लेखेर घरको दलान वा भित्तामा लेखेर बताई दिन्छ ।
कसै माथी शंका छ भन्ने प्रश्नमा उनले भन्छिन् मेरो कसै संग पनि झगडा परेको छैन । देख्ने गरी मेरा दुश्मन पनि छैनन् । कसै संग फोनमा केहि केरा पनि हुन्न । शंका गर्ने खालका मान्छे छिमेकमा देख्दिन । बिबाहपुर्व तपाईलाई कसैले एकतर्फी प्रेम गरेको पो थियो र यसो गर्दै छ कि ? भन्ने अर्को जिज्ञासामा उनले भनिन् खै मलाई कसैले त्यसो भनेको थिएन क्यारे मलाई केहि थाह भएन ।
त्यस पत्रमा पार्टीको नाम जोडिएपछि नेपाली कांग्रेस रेसुङ्गा नगर सभापति छबि पाण्डे पनि प्रहरीमा पुगेका छन् । उनि भन्छन्–‘२०६२ साल देखि सदरमुकामको त्यति नजिक र यति धेरै डरलाग्दा घटना घट्दा पनि प्रहरीले अनुसन्धानमा गम्भीरता नदेखाउनु विडम्वनाको कुरा हो, यस्तै हो भने यी महिला र उनका सन्तान थप असुरक्षित हुने देखिन्छ । ’
यस सम्वन्धमा जिल्ला प्रहरी कार्यालयकोे ध्यानाकृष्ट गराउँदा प्रवक्ता रोशन खड्काले आफुले भर्खर थाहा पाउनासाथ प्रहरीको टोली घटना स्थलमा पठाएको र त्यसबारे अब गम्भीर अनुसन्धान हुने बताए । उनको घर संग जोडिएको सासु ससुरा बस्ने बुढो घर छ । जहाँ सासु ससुरा मात्रै बस्छन् । जेठाजु सधैँ जसो भारतमा बस्छन् । जेठानी दिदी भारतमा गएको ६ महिना भयो । सासु ससुरा संग बोलचाल राम्रै छ । तर आवत जावत भने नभएको उनले बताईन् ।