‘जय भोले’ र ‘छक्का पञ्जा–३’ को भिडन्त टर्यो

काठमाडौं । चलचित्र ‘जय भोले’ र ‘छक्का पञ्जा–३’ को भिडन्त टरेको छ । दिपाश्री निरौला निर्देशित फिल्म ‘छक्का पञ्जा–३’ र अशोक शर्मा निर्देशित फिल्म ‘जय भोले’ दशैं लक्षित भएर प्रदर्शन तयारीमा लागे पनि दुईवटै फिल्मका लागि प्रदर्शन मिति तय गर्न सकस भयो ।
दशैंलाई केन्द्रमा राखेर एक साथ प्रदर्शनमा ल्याउने होडका कारण दुवै फिल्मको प्रदर्शन मिति तय हुन सकेको थिएन । तर, केहीदिन अघिको दुई फिल्म युनिटबीच भएको आपसी समझदारीपछि फिल्म छुट्टाछुट्टै मितिमा आउने निश्चित भएको हो । सोहीअनुसार फिल्म ‘छक्का पञ्जा –३’ घटस्थापनाबाट र ‘जय भोले’ फूलपातीबाट प्रदर्शनमा आउनेछ ।
फिल्म ‘जय भोले’ ले मंगलबारबाट पोष्टर पनि सार्वजनिक गरेको छ । अभिनेता खगेन्द्र लामिछाने, स्वस्तिमा खड्का, सौगात मल्ल मुख्य भूमिकामा रहेको फिल्ममा अन्य कालकार सलोन बस्नेत, राजाराम पौडेल, बुद्धी तामाङ लगायतको अभिनय रहेको छ ।
‘छक्का पञ्जा –३’ मा दिपाश्री, दिपकराज गिरी, दीपिका प्रसाईं, प्रियंका कार्की, जितु नेपाल, केदार घिमिरे, बर्षा राउत, बुद्धि तामाङ, स्वस्तिमा खड्का, संजोग कोइरालाले अभिनय गरेका छन् ।