‘चंगा चेट’ र ‘मालिका’ को प्रतिस्पर्धा हुने

काठमाडौं । यही कात्तिक १६ गते शुक्रबारबाट प्रदर्शनमा आउन लागेको चलचित्र ‘चंगा चेट’ को फष्टलुक सार्वजनिक भएको छ । ‘गोजीमा दाम छैन’ बोलको गीत सार्वजनिक भएसँगै चर्चा पाएको यो चलचित्रको टिमले प्रमोशन अगाडी बढाइरहेको छ ।
केही दिनअघि मात्र सार्वजनिक गरिएको चलचित्रको फस्टलुकमा मुख्य चार कलाकार देखिएका छन् । उनीहरु अपराधीको रुपमा देखिएका छन् । आयुष्मान देशराज जोशी, सुरक्षा पन्त, रविन्द्र झा र सन्दिप क्षेत्रीलाई अपराधीको रुपमा उभ्याइएको छ । जसले गर्दा दर्शकका लागि कौतुहल थपिएको छ ।
दिपेन्द्र के खनालको निर्देशनमा तयार भएको यो चलचित्रलाई माधव वाग्ले र शर्मिला पाण्डेले मिलेर बनाएका हुन् । ‘चंगा चेट’ ले रेखा थापाको ‘मालिका’ चलचित्रसँग प्रतिस्पर्धा गर्नुपरेको छ ।
प्रदर्शन मिति नजिकिएसँगै मालिका निर्माण टिमले पनि नयाँ पोष्टर सार्वजनिक गरेको छ । सार्वजनिक भएका पोष्टरमा चलचित्रकी मुख्य कलाकार रेखा र कमला वली फिचर्ड छन् । उनीहरु एक्शन अवतारमा देखिएका छन् । रेखा आफैले निर्देशन गरेको यो चलचित्रमा नारी विभेदलाई समेटीएको छ ।

नरबहादुर कार्कीको लगानी रहेको चलचित्रमा सरस्वती थापा र तारा थापासमेत निर्माता रहेका छन् । चलचित्रमा कर्णालीकी कमला वलीले थापालाई साथ दिएकी छिन् भने थापाले कमलालाई आफ्नो चलचित्रको हिरोको रुपमा प्रस्तुत गराएकी छन् ।
रेखा फिल्मको ब्यानरमा निर्माण भएको चलचित्रमा रामशरण उप्रेतीको छायांकन, शिवम अधिकारीको पटकथा रहेको छ भने चलचित्रको कथा तथा कन्सेप्ट रेखा थापा र नर बहादुर कार्कीको हो ।