सुहाना बोल्ड, अनमोल रोमान्टिक
काठमाडौं । सुनील कुमार थापाले निर्माण र झरना थापाद्वारा निर्देशित फिल्म ‘ए मेरो हजुर ३’ चैत्र २९ गते नयाँ वर्षको मौका पाएर प्रदर्शनमा आउने भएको छ । सो चलचित्रको रोमान्टिक गीत सार्वजनिक गरिएको छ । गीतको भिडियोलाई बुढासुब्बा डिजिटलको युट्युबमा च्यानलमार्फत सार्वजनिक गरिएको हो ।
‘जिन्दगी नै भन्दिन’ बोलको गीतमा सुगम पोखरेल र प्रविशा अधिकारीको स्वर छ भने एक नारायण भण्डारीका शब्द छन् । यस्तै गीतमा आकाश अविरलको संगीत र एचबीएन किस्मतको संगीतको मिक्सिङ छ ।
गीतको भिडियोमा युवापुस्तामाझ लोकप्रिय कलाकार अनमोल केसी र निर्देशक थापाकी छोरी सुहाना थापाको जोडी देख्न सकिन्छ ।
भिडियोमा अनमोल र सुहानाको जोडी सुहाएको देखिन्छ । यो फिल्म सुहानाका लागि डेब्यु फिल्म हो । फ्यानले गीत रिलिज हुनासाथ अनमोल र सुहानाको जोडी सुहाएको प्रतिक्रिया दिएका छन् ।
मनाङ आइसलेक, सगरमाथा बेसक्याम्प र अमेरिकाको न्युयोर्कको रमणीय ठाउँहरुमा चलचित्रको गीतको छायाँकन गरिएको बताइएको छ ।
बाबुराम दाहाल, छेतेन गुरुङ, सुमन पौडेल र प्रतिक पौडेलको संवाद लेखेको यो चलचित्रमा अनमोल र सुहानाको साथमा अर्पण थापा, सलोन बस्नेत, रविन्द्र झा, रुपा घिसिङ, रक्षा गौतम, विशाल पहारी, सरोज खनाल लगायत कलाकारकोपनि अभिनय छ ।